الحاجات

كتبهاالبراء ، في 22 يوليو 2008 الساعة: 11:10 ص

على طووووول الواحد كل ما يخلص من حاجة
لازم تظهر له حاجات جديدة عايز يخلصها
او بمعنى اصح عايز يخلص منها

الكلام ده خدناه في الاقتصاد السنة اللي فاتت
كان بيقولك ايه ::
ان الانسان كلما نجح في اشباع عدد معين من حاجاته
ظهرت له حاجات جديدة تحتاج الى الاشباع
وكأنه يسعى الى هدف متحرك

والواحد طبعا شايف الحكاية دي واقع في حياته
فالحمد لله خلصنا من الثانوية العامة
وبعد المذاكرة وطلوع الروح
وبعد النتيجة وايام العصبي
ظهرت لنا بقى حكاية التنسيق اللي مش عايزة تخلص
وخايف لاحسن تجيلك كلية مش عايزها
او كليه في الاقاليم تبقى مشكلة
او الكلية اللي انت عايزها ما تجيش
او تيجي بس القسم او التخصص اللي انت عايزه له شروط معينه ومش هايقبلك

كل دي حاجات محتاجة لاشباع
طبعا ده غير ان انت مش لاقي شغل
كماان غير انشغالك في مجتمع الانترنت
وكمان عايز تتصور 8 صور عشان تقدمهم في الكلية
مش كدة وبس …
انا عايز اختم القرآن الصيف ده والحكاية دي طبعا من اولويات الصيف
ولسة ما خدناش فيها اي خطوة سوى التفكير والعزم
وكمان عايز اجيب موبايل جديد لاحسن الموبايل بتاعي بقى وحش خالص
وكمان عايز اشتري فيجا للكومبيوتر عشان تشغل لي الفيفا 2008 اللي نفسي العبها ومش عارف

كل دي حاااااجااااااااات عايزة اشباع
ياريت تدعولي اني اقدر اشبع كل الحاجات اللي عايزة تتشبع دي
بس الاول هاروح اكل لاحسن ماكلتش خالص من الصبح
عشان لازم اشبع الحاجة اللي جوايا اللي مخلياني حاسس ان في حمير جوة في بطني عمالة تنهق
قعدوا ياكلوا في بعض لحد اما فضل واحد خانقني من الصبح
عاملي صداع في معدتي