انا اتخنقت !!!!
كتبهاالبراء ، في 8 مايو 2008 الساعة: 19:15 م
والله الواحد متضايق
ومين فينا مش متضايق
من القهر والظلم والفساد والاستبداد اللي احنا عايشين فيه
الناس فرحت جداا بعد ما الرئيس زود العلاوة
وزيطة وزمبليطة
كل ده عشان سبب واحد بس
ان فيه اضراب في عيد ميلاد الرئيس
قام صاحبنا الرئيس قالك انا اضحك عالشعب
واقوم عاطيله علاوة في المرتبات الحكومية قبل الاضراب بيوم
يفشل الاضراب
طب ياريس
سيادتك هاتديهم زيادة 30 %
نجيبهم منين
مافيش موارد
ما هو اصل لما انا ادي علاوة زيادة
ويفشل الاضراب
تاني يوم على طول
نغلي الاسعار
وفعلا هو ده اللي حصل
اللي اعطاه الرئيس باليمين
اخده بالشمال 3 اضعاف ونصف
وقدر يضحك على الشعب
بكام كلمة قالها في البتاع اللي كانوا جايبينه في التلفيزيون
ونزلت الجرايد يوم الاضراب
او يوم عيد ميلاد الرئيس
تشكر في الرئيس
واخترناك اخترناك
وعشان كدة احنا اخترناك
وهشتكنا وبشتكنا يا ريس
ده انت رئيس والنعمة كويس
يا مدلعنا يا مشخلعنا
هشتكنا وبشتكنا يا ريس
ومش كدة وبس
اعتقد انه وصل عند البعض الى حد الكفر
فقام احد الصحفيين بعمل مناجاة
مناجاة في احد جرائده
بس مش مناجاة لله
مناجاة للرئيس
{لا اله الا الله }
مش عارف الراجل ده قادر يعيش ازاي
لا حول ولا قوة الا بالله
وصل به الجراءة ان يقول
لمن غيرك نشتكي ؟
وكأنه خلاص
مافيش جنة ولا في نار
الا عند الرئيس مبارك
لا اله الا الله
انا كل ما افتكر الحكاية دي
اقول اشهد ان لا اله الا الله
لا اله الا الله
ما علينا … نرجع لما بعد الاضراب
بعد الهيصة اللي اتعملت
وبعد ما فشل الاضراب وتاني يوم على طول الاسعار غليت
والسواقين الغلابة اصبحوا محتارين
يغلوا على الناس زي البقر اللي غلوا عليهم
ام يكونوا متسامحين مع الناس ويحملوا الهم مع هذا الشعب المهموم
وصل في بعض الحالات الى العراك والضرب في القاهرة
والله انا مش عارف اعمل ايه بس توصلت الى حل
انا هاقول لربنا بس انت يارب اللي هتخرجنا من اللي احنا فيه
انت يا رب اللي احنا مالناش حد غيرك نشكوا اليه
يارب عليك بالظلمة والمفسدين
يا رب عليك باللي خربوا البلد كلهم واحد ورا التاني
يا رب اشفي غليل الناس فيهم
وكل يوم هادعي الدعاء ده
وفي كل الصلوات
لأن الحال لا يطاق
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
